Evrópublómið

Blómið er opinbert umhverfismerki Evrópusambandsins.

Það var sett á laggirnar árið 1992 og í dag eru yfir 77.000 vörutegundir og þjónusta merktar Blóminu á evrópska efnahagssvæðinu. Evrópublómið er eitt af þeim umhverfismerkjum sem við treystum og auðveldar okkur neytendum að velja vörur og þjónustu sem fara betur með bæði umhverfið og heilsu okkar.

Hvað þýðir Evrópublómið?

Til að hljóta Evrópublómið þarf vara að gangast undir ítarlegt mat sem byggir á vísindalegri lífsferilsgreiningu (e. life cycle assessment).

Þetta þýðir að umhverfisáhrifin eru metin á öllum stigum, allt frá öflun hráefna, í gegnum framleiðslu, dreifingu og notkun, og að lokum til förgunar eða endurvinnslu.

Viðmiðin eru þróuð í opnu og gagnsæju ferli þar sem sérfræðingar, vísindamenn, fulltrúar iðnaðarins, neytendasamtök og umhverfisstofnanir koma saman til að tryggja að kröfurnar séu bæði metnaðarfullar og raunhæfar.

Þessar kröfur eru síðan endurskoðaðar reglulega til að endurspegla tækniframfarir og nýja vísindalega þekkingu.

Af hverju að velja vöru merkta Evrópublóminu?

Evrópublómið er áreiðanlegur leiðarvísir að umhverfisvænni vörum. Á bak við merkið er heildstæð nálgun sem tryggir að tekið sé tillit til umhverfisáhrifa á öllum stigum lífsferils vörunnar.

Helstu áherslur Evrópublómsins:

• Lífsferilsnálgun: Kröfur merkisins ná yfir allan lífsferilinn, frá hráefnisvinnslu og framleiðslu, yfir í pökkun, dreifingu, notkun og að lokum til förgunar eða endurvinnslu.
• Strangar efnakröfur: Mikil áhersla er lögð á að takmarka notkun efna sem eru skaðleg fyrir umhverfið og heilsu manna. Þetta verndar bæði neytendur og starfsfólk í framleiðsluferlinu.
• Minni umhverfisáhrif: Settar eru kröfur um minni vatns- og loftmengun, minni losun gróðurhúsalofttegunda og stuðlað að verndun líffræðilegrar fjölbreytni.
• Hringrásarhagkerfið: Merkið hvetur til minni úrgangsmyndunar, notkunar á endurunnu hráefni og hönnunar á vörum sem endast lengur og auðveldara er að endurvinna.
• Gæði og virkni: Til að fá vottun þarf vara ekki aðeins að vera umhverfisvæn, heldur einnig að standast kröfur um notagildi og gæði, svo neytandinn þurfi ekki að velja á milli virkni og umhverfisverndar.